Zumalakarregi Museoa DSS2016ean

2016/01/22

Donostia/San Sebastián 2016 Europako Kultur Hiriburua hastear dugun honetan, Zumalakarregi Museoa bere partaidetzaren berri ematera datorkizue.

Donostia 2016 Europako Kultur Hiriburutzaren antolakuntzak hasieratik izan zuen lurralde osora zabaltzeko asmoa. Horrela izan zen egitasmoaren erakusketa nagusia izango den "Bake Ituna" proiektuaren sorreratik bertatik.

Bake ituna

Izan ere, 2013an aurtengo erakusketa nagusiaren entsegua izango zen "1813. Donostiaren setioa, sutea eta berreraikitzea" erakusketa sailean, Zumalakarregi Museoaren partaidetza nabarmena izan zen. Batetik Donostian aurkeztu zen erakusketako aholkulari historikoak izan ginelako. Alegia, San Telmo eta Untzi Museoan egin ziren erakusketen diskutso historikoan parte izan ginela, gainera gure bildumako pieza desberdinak aurkeztuz.

Inbasioak

Gure esku egon zen baita ere Irun, Tolosa eta Bergaran aurkeztu zen "Inbasio Napoleonikoak" erakusketa ibiltariaren kudeaketa. Azkenik, Ormaiztegin bertan, Zumalakarregi Museoan, erakusketa nagusiaren parte ziren bi atal aurkeztu genituen, biak ala biak, "1823, San Luisen Ehun Mila Semeak" izenburupean. Lehenak arte garaikidearen ikuspegia eskaintzen zuen "Gaur egungo kontaketa" deitu genion. Bigarrenak, aitzitik, ikuspegi historikoa zuen xede eta "Kontaketa historikoa" izan zen.

Hernani

San Luisen Ehun Mila Semeak Hernanira sartzen. Iturria.

Aurten ere DSS2016ko erakusketa nagusia izango den "Bake Ituna" ekimenean parte hartuko dugu, Donostiatik kanpo burutuko diren 7 ikerketa-kasuetako bat Ormaiztegi eta Bergaran garatuko baita, "1839. Bergarako Besarkada. Keinua eta interpretazioa” erakusketa.

Oda a la Paz

Bergarako besarkada garaiko grabatuan.

Izan ere, Euskal Herrian bake itunik egon bada, zalantzarik gabe esan dezakegu "Bergarako Besarkada" hauen artean ezagunenetakoa dugula. Gaia, gainera, eztabaidarako aproposa dela uste dugu eta aurrekoan bezala, arte garaikideak bere esparrua izango du datorren udan, Ormaiztegiko Zumalakarregi Museoan eta Bergarako Laboratorium Museoan zabalduko den erakusketa honetan.